ShQO-da halyqqa beıádep sóz aıtqan aýyl ákimine aıyppul salyndy

ÓSKEMEN. KAZINFORM – Shyǵys Qazaqstan oblysy Zaısan aýdanynda halyqqa beıádep sóz aıtqan aýyl ákimine 55 048 teńge kóleminde aıyppul salyndy.   

Aýyl ákimine qarasty is Zaısan aýdandyq sotynda qaraldy. 

– Shilikti aýylynyń ákimi 6 qazanda saǵat 15:00 shamasynda qyzmettik kabınetinde aınalasyndaǵylarǵa qurmetsizdik tanytyp, beıádep sóz aıtqan. Sot protsesi barysynda óz kinásin moıyndaǵan ol bul áreketine ókinetinin jetkizip, kópshilik aldynda keshirim surady, - dep habarlady ShQO sotynyń baspasóz qyzmetinen. 

Sot sheshimimen ákim QR ÁQBtK-niń 434-babynyń 1-bóligi (usaq buzaqylyq) boıynsha kináli dep tanylyp, 55 048 teńge kóleminde aıyppul tóleýge mindetteldi. Qaýly áli zańdy kúshine engen joq. 

Eske salsaq, osyǵan deıin ShQO-da halyqqa beıádep sóz aıtqan aýyl ákimine qatysty tekserý júrgiziletini habarlanǵan.