ShQO-da halyqqa beıádep sózder aıtqan aýyl ákimine qatysty tekserý júrgizilmek

ÓSKEMEN.KAZINFORM – Shyǵys Qazaqstan oblysy Zaısan aýdanynda halyqqa beıádep sózder aıtqan aýyl ákiminiń vıdeosyna qatysty óńir ákimdiginen túsinikteme berdi. 

Áleýmettik jelide Zaısan aýdanyndaǵy aýyl ákimi túsirilgen, beıádep sózder qoldanylǵan beınejazba tarap ketti. 

Buǵan qatysty ShQO ákimdigi baspasóz qyzmetinen túsinikteme berdi.

- Atalǵan fakti boıynsha aýyl ákiminen resmı túsinikteme talap etildi. Oblys ákimdigi bul materıaldardy Memlekettik qyzmet isteri agenttiginiń Ádep jónindegi keńesine joldady. Onda qyzmettik ádep normalarynyń buzylý máselesi qaralady. Mundaı áreketterge jol berilmeýi tıis. Óńir basshylyǵy bylapyt sóz qoldanýǵa, ádepsiz qylyq tanytýǵa túbegeıli qarsy, - delingen aqparatta.

Osy rette, ákimdik ókilderi etıkalyq normalardy buzǵan memlekettik qyzmetshilerge qatań jaza qoldanylatynyn eskertti.

Eske salsaq, osyǵan deıin petropavldyq bloger beıádep sózderi úshin aıyppul arqalaǵany habarlanǵan.