ShQO-da halyq emimen aýrýynan aıyqpaq bolǵan er adamnyń kózi kórmeı qala jazdady

ÓSKEMEN. KAZINFORM – Shyǵys Qazaqstan oblysy Glýbokoe aýdanynda halyq emimen aýrýynan aıyqpaq bolǵan er adamnyń kózi kórmeı qala jazdady.

Glýbokoe aýdanynda turatyn 39 jastaǵy azamatqa sýyq tıip qalǵan. Keıin gaımorıttiń belgileri baıqaldy. Alaıda ol dárigerge qaralǵannyń ornyna halyq emi arqyly emdelmek bolady. Sóıtip, murnyn qaınatylǵan túımedaq sýymen shaıyp, mııa tamyrynyń tunbasyn ishe bastaıdy.

Áýelde jaǵdaıy jaqsaryp kele jatqandaı kóringenimen bir aptadan soń kóz tusy qatty aýyrsyna bastady. Keıin kórý qabileti de nasharlaı túsken. Tynys alýy qıyndap, dene qyzýy kóterilip, kózinde isik paıda bolǵan naýqas shuǵyl túrde Óskemen qalasyndaǵy aýrýhanaǵa jetkizildi.

- Endoskopııalyq tekserý kezinde asqyný týdyrǵan muryn qýystarynyń sańylaýlaryn bitep tastaǵan úlken kısta anyqtaldy. Otadan keıin naýqastyń jaǵdaıy turaqtandy. Kelesi kúni kórý qabileti qalpyna kele bastady, - dep habarlady oblystyq aýrýhanadan.

Osy rette, dárigerler halyq emimen óz-ózin emdeýdiń sońy aýrýdyń odan saıyn asqynýyna ákelip soǵýy múmkindigin eskertedi.

Eske salsaq, buǵan deıin ShQO turǵyndarynyń onkologııalyq dárilerdi ala almaı ábigerge túskeni jaıly jazǵanbyz.