ShQO-da «gonkong tumaýyn» juqtyrý jaǵdaılary anyqtaldy

ÓSKEMEN. KAZINFORM — Shyǵys Qazaqstan oblysynda «gonkong tumaýyna» shaldyqqandar tirkelip jatyr. 

ShQO sanıtarlyq-epıdemıologııalyq baqylaý departamentiniń málimetinshe, bul jańa vırýsty juqtyrǵandardyń dene qyzýy 40 gradýsqa deıin kóterilip, ońaılyqpen túspeıdi. 

— Zerthanalyq monıtorıng nátıjesinde oblysta A/H2N3 tıpti tumaýdyń, ıaǵnı «gonkong tumaýynyń» 5 faktisi anyqtaldy. Bul vırýsty emdeý jalpy jedel respıratorlyq vırýstyq ınfektsııalardy emdeý tártibimen birdeı júrgiziledi, — deıdi departamenttiń epıdemıologııalyq baqylaý bóliminiń basshysy Ásem Halyqova.

Óńirde epıdemıologııalyq maýsym bastalǵaly bergi bir jarym aı ishinde 41 myń JRVI tirkelgen. Naýqastardyń jartysynan astamy — 14 jasqa deıingi balalar. Soǵan qaramastan, bul kórsetkish byltyrǵy 2024-2025 maýsymmen salystyrǵanda 10 paıyzǵa tómen.

— Oblysta tumaýdan bólek rınovırýs, adenovırýs jáne bokovırýs ta tarap jatyr. Sońǵy aptada JRVI-men syrqattanǵandar sanynyń óskeni baıqalady, — deıdi Á.Halyqova.

Eske salsaq, osyǵan deıin Almatyda tumaý juqtyrǵandardyń sany 15 myńǵa jaqyndaǵany habarlanǵan.