ShQO-da ǵımaratty jóndegen kompanııa «QazAvtoJoldy» sotqa berdi
ÓSKEMEN. KAZINFORM - Shyǵys Qazaqstan oblysynda merdiger uıym Óskemen qalasyndaǵy ákimshilik ǵımaratqa júrgizgen jóndeý jumystarynyń aqysyn óndirý úshin «QazAvtoJol» ulttyq kompanııasyn sotqa berdi. Birinshi satydaǵy sot qurylysshylardyń talabyn qanaǵattandyrǵan. Al ulttyq kompanııa sot sheshimine apellıatsııalyq shaǵym túsirýge daıyndalyp jatyr.
Daý «QazAvtoJol» UK» AQ men «Stroı Kontınent» JShS arasynda Óskemen qalasyndaǵy fılıal ǵımaratyn jóndeý boıynsha jasalǵan kelisimsharttan týyndaǵan. Jumys barysynda merdigerler bastapqy jobalyq-smetalyq qujattamada qarastyrylmaǵan aqaýdy anyqtap, qosymsha 8 mln 938 myń 744 teńgeniń jumysyn atqarǵan. Qurylysshylar jylytý maýsymy bastalǵanǵa deıin nysandaǵy jumystardy aıaqtaýdy kózdep, qajetti materıaldardy óz qarajatyna satyp alyp, jumysshylardyń eńbekaqysyn da tólegen.
Tapsyrys berýshi ókilderi qosymsha jumystardyń oryndalýyn tehnıkalyq keńester barysynda tirkep otyrdy. Alaıda oryndalǵan jumystardy qabyldaý jáne tıisti qujattardy rásimdeý kezeńinde taraptar arasynda kelispeýshilik týyndaǵan. Bekitilgen qosymsha kelisim bolmaǵandyqtan, merdigerge qarajat aýdarylmaǵan.
Bul másele «Atameken» UKP ShQO kásipkerlerdiń quqyqtaryn qorǵaý jáne sybaılas jemqorlyqqa qarsy is-qımyl jónindegi keńesiniń otyrysynda talqylandy.
– Qosymsha jumys kóleminiń qajettiligi jyl boıy ótken tórt birlesken keńestiń hattamasynda rastalǵan. Merdiger nysandaǵy jumysty tolyq aıaqtaǵan. Alaıda tapsyrys berýshi tarapynan qarjylandyrýdy kelisýdiń ishki rásimderi uzaqqa sozylyp, oryndalǵan jumystardyń aqysy ýaqytyly tólenbedi, – dedi keńes tóraǵasy Igor Shatskıı.
«QazAvtoJol» UK» AQ oblystyq fılıaly atalǵan daýǵa qatysty resmı túsinikteme berdi.
– Aǵymdaǵy jóndeý barysynda merdiger uıym tehnıkalyq qujattamada bastapqyda kózdelmegen qosymsha jumystardy oryndaǵan. Keıin olardyń aqysyn tóleýge qatysty kelispeýshilikter týyndap, másele sotta qarala bastady. 2025 jylǵy qarashada «Stroı Kontınent» JShS 8,9 mln teńge óndirý týraly talap aryz berdi. Alaıda ShQO mamandandyrylǵan aýdanaralyq ekonomıkalyq sotynyń 2026 jylǵy 13 sáýirdegi sheshimimen talapty qanaǵattandyrýdan bas tartyldy. 2026 jylǵy 1 shildede apellıatsııalyq satydaǵy sot ta bul sheshimdi ózgerissiz qaldyrdy, – delingen aqparatta.
Osydan keıin merdiger uıym oryndalǵan jumystar týraly birjaqty aktini jaramdy dep taný jáne bereshekti óndirip alý týraly jańa talap aryz bergen.
– ShQO mamandandyrylǵan aýdanaralyq ekonomıkalyq sotynyń 2026 jylǵy 9 qarashadaǵy sheshimimen merdiger uıymnyń aktini jaramdy dep taný jáne qosymsha jumystardyń qunyn óndirip alý týraly talaptary qanaǵattandyryldy. Tapsyrys berýshi sot sheshimimen kelispeıdi. Ulttyq kompanııanyń quqyqtary men zańdy múddelerin qorǵaý maqsatynda fılıal zańnamada belgilengen bir aı merzim ishinde apellıatsııalyq shaǵym túsiredi, – delingen vedomstvo habarlamasynda.
Merdiger uıym men ulttyq operator arasyndaǵy qarjylyq daýǵa qatysty sońǵy núkteni endi ekinshi satydaǵy sot qoıady.
Eske salsaq, osyǵan deıin ShQO-daǵy altyn ken ornyna qatysty asa iri kólemdegi alaıaqtyq deregi boıynsha qylmystyq is tergelip jatqany habarlanǵan.
