ShQO-da gaz quıý stansasyndaǵy jarylystan zardap shekkenderdiń barlyǵyna kómek kórsetiledi – ákim
Shemonaıha qalasynda gaz quıý stansasynda bolǵan jarylystan eki adam kúıip qalǵany habarlanǵan edi.
Sol kúni keshke qaraı jarylystan taǵy eki azamattyń zardap shekkeni anyqtalǵan.
Aımaq basshysy Ermek Kósherbaev sol 4 adamǵa barlyq qajetti kómek kórsetiletindigin aıtty.
«Olar shuǵyl túrde aýrýhanaǵa jetkizildi. Sondaı-aq aýdandyq aýrýhanaǵa oblystyń bas dárigeri Gúlmıra Zagıdýllına da bardy. Qazir quzyrly organdar órttiń sebepterin anyqtap jatyr. Tótenshe jaǵdaı ornyna ShQO Polıtsııa departamentiniń bastyǵy men tergeýshiler, meniń orynbasarym Darhan Sapanov jáne Shemonaıha aýdanynyń ákimi Grıgorıı Akýlov bardy», - deıdi ol.
Oblys ákiminiń aıtýynsha, zardap shekkenderge barlyq qajetti kómek kórsetiledi.
«Óńirdegi osyǵan uqsas obektilerde mundaı jaǵdaıdyń qaıtalanýyna jol bermeý kerek. Sol úshin tekserý júrgizilip, sonyń nátıjeleri týraly mindetti túrde habarlaımyz», - deıdi E.Kósherbaev.
