ShQO-da ǵarysh monıtorınginiń arqasynda 73 órt anyqtaldy

ÓSKEMEN. QazAqparat – Shyǵys Qazaqstan oblysynyń qutqarýshylary ǵarysh monıtorınginiń arqasynda 73 órtti anyqtap, ýaqtyly sóndirdi, dep habarlaıdy QazAqparat tilshisi.

ShQO tótenshe jaǵdaılar departamenti óńirde ystyq ári qurǵaq aýa raıyna baılanysty jurtshylyqqa órt qaýipsizdigi erejelerin qatań saqtaý qajettigin eskertýde. Qyzyl jalynnyń shyqqanyn birden anyqtap, onyń ary qaraı jaıylýyna jol bermes úshin TJD qyzmetkerleri ǵarysh monıtorıngin paıdalanady.

«Búgingi tańda ǵarysh monıtorınginiń kómegimen 73 dala órti anyqtalyp, jedel aýyzdyqtaldy. Órttiń kóbisi azamattardyń otty abaısyz paıdalanýynan jáne qarapaıym qaýipsizdik sharalaryn saqtamaýyna baılanysty shyǵyp jatyr» - deıdi departamenttiń memlekettik órt baqylaý basqarmasy bastyǵynyń mindetin ýaqytsha atqarýshy Nurjan Ómirjanov.

Onyń aıtýynsha, órt qaýpi joǵary kezeńde esh jaǵdaıda shópti órteýge, ormanda ot jaǵýǵa bolmaıdy. Balalarǵa otpen jáne sirińkemen oınaýdyń qaýiptiligi týraly barynsha túsindirý qajet. Kólikpen jolda kele jatqanda terezeden sóndirilmegen temeki tuqylyn laqtyrýǵa tyıym salynady.

Órt qaýipsizdigi erejelerin saqtamaǵandar QR Ákimshilik quqyq buzýshylyq týraly kodeksiniń 336, 410-baptary boıynsha jaýapqa tartylady.