ShQO-da esirtki zerthanasyn uıymdastyrǵan eki latvııalyq sottaldy

ÓSKEMEN. KAZINFORM – Shyǵys Qazaqstan oblysynda sıntetıkalyq esirtki óndiretin zerthanaǵa qatysty qylmystyq istiń úkimi shyqty.

ShQO prokýratýrasynyń habarlaýynsha, úkim qylmystyq ister jónindegi mamandandyrylǵan aýdanaralyq sotynda shyǵarylǵan. Sheteldikter QR Qylmystyq Kodeksiniń 297-baby 3-bóligi boıynsha (esirtkini asa iri mólsherde zańsyz óndirý, qaıta óńdeý jáne ótkizý) sottaldy.

- Bul asa aýyr qylmys sanatyna jatady. Sottalýshylar táýligine 30 kelige deıin mefedron shyǵarýǵa múmkindik beretin zerthana qurǵan, - delingen aqparatta.

Tergeý málimetteri boıynsha, jerasty zerthanasyn 2024 jyldyń shildesinde UQK ShQO boıynsha departamentiniń qyzmetkerleri anyqtady. Tintý kezinde 125 keli mefedron tárkilendi, bul 630 myń bir rettik dozaǵa teń. Tárkilengen esirtkiniń quny «qara naryqta» 3,5 mlrd teńgeden asady.

- Sot sheshimimen esirtki saýdasyn uıymdastyrdy dep aıyptalǵan latvııalyqtar 11 jylǵa bas bostandyǵynan aıyryldy. Olar jazasyn óteý úshin qaýipsizdigi ortasha túzetý mekemesine jiberildi. Úkim áli zańdy kúshine engen joq, - delingen aqparatta.

Eske salsaq, ShQO-da 21 adamdy aldap, 101 mln teńge paıda kórgen alaıaq sottalǵany habarlanǵan.