ShQO-da esirtki zerthanasyn uıymdastyrǵan eki er adam 11 jylǵa sottaldy
ÓSKEMEN.KAZINFORM — Shyǵys Qazaqstan oblysynda psıhotroptyq zattar óndirýge arnalǵan jasyryn zerthana uıymdastyrǵan eki er adamǵa qatysty sot úkimi shyqty.
Belgili bolǵandaı, tártip saqshylary olardan 76 keliden astam esirtki tárkilegen.
ShQO qylmystyq ister jónindegi mamandandyrylǵan aýdanaralyq sotynyń málimetinshe, sottalǵandar 2025 jyldyń qańtar aıynan bastap belgisiz tulǵanyń jetekshiligimen Samar aýdanynan turǵyn úı satyp alyp, ony psıhotroptyq zattar óndiretin zerthana retinde jabdyqtaǵan. Zańsyzdyqqa UQK departamentiniń qyzmetkerleri tosqaýyl qoıdy.
— Tintý barysynda jalpy salmaǵy 76 keliden asatyn α-PVP psıhotroptyq zaty, arnaıy qural-jabdyqtar men hımııalyq prekýrsorlar tárkilendi. Sot otyrysynda aıyptalýshylar kinálaryn tolyq moıyndap, ókinetinderin bildirdi, — delingen aqparatta.
Sot sheshimimen ekeýi 11 jylǵa bas bostandyqtarynan aıyryldy. Tárkilengen qural-jabdyqtar men zattar joıylyp, zerthana ornalasqan úı memleket kirisine tárkilendi. Úkim áli zańdy kúshine engen joq.
Eske salsaq, buǵan deıin Túrkistanda áıelin psıhıatrııalyq ortalyqqa májbúrlep jatqyzǵan er adam sottalǵany habarlanǵan.