ShQO-da esirtki ósirýge arnalǵan 4 fıtozerthana joıyldy
ÓSKEMEN. KAZINFORM — Shyǵys Qazaqstan oblysynda polıtseıler 20 keliden astam esirtkini tárkiledi.
Óńir aýmaǵynda 1 maýsymnan beri «Qarasora-2025» jedel aldyn alý sharasy ótkizilip jatyr. Sonyń aıasynda esirtkige qatysty 41 quqyqbuzýshylyq tirkeldi.
Tártip saqshylary 20 keliden astam túrli esirtki zattaryn tárkilep, esirtki taratýmen aınalysqan adamdardy ustady. Bul týraly ShQO PD Esirtki qylmystaryna qarsy is-qımyl basqarmasynyń bastyǵy Dáýlet Jumadilov málim etti.
— Tárkilengen zattardyń ishinde «mefedron» men «alfa-PVP» sekildi psıhobelsendi zattar bar. Barlyq kúdikti ýaqytsha ustaý ızolıatoryna qamalyp, sotqa deıingi tergeý amaldary júrgizilip jatyr. Sonymen qatar polıtsııa qyzmetkerleri esirtki ósirýge arnalǵan 4 fıtozerthanany joıdy, — dedi ol.
Eske salsaq, osyǵan deıin Almaty oblysynda jasyryn esirtki zerthanasy tabylǵany habarlanǵan.