ShQO-da esirtki tasymaldaý kanaly áshkerelendi

ÓSKEMEN. QazAqparat – Shyǵys Qazaqstan oblysynda iri mólsherde esirtki tasymaldap, satýmen aınalysqandardyń joly kesildi, dep habarlaıdy QazAqparat tilshisi.

ShQO Polıtsııa departamenti esirtki qylmysyna qarsy is-qımyl basqarmasynyń qyzmetkerleri «Qarasora-2020» jedel aldyn alý sharasy barysynda arnaıy operatsııa ótkizip, baǵasy 15 mıllıon teńgeden asatyn «gashısh» esirtkisin tárkiledi.

Anyqtalǵandaı, aǵaıyndylar sóz baılasqan sybaılastarymen birge ońtústik aımaqtardan Shyǵys Qazaqstanǵa esirtki jetkizetin kanal qurǵan. Olar esirtkini Almatydan Óskemenge tasymaldaý úshin logıstıkalyq kompanııanyń qyzmetterin paıdalanyp, «taýardy» alǵan soń óńir aýmaǵynda satýmen aınalysqan.

Tártip saqshylary Ulttyq ulannyń 5518 áskerı bóliminiń «Búrkit» arnaıy jasaǵymen birlesip esirtki satýshylardy qolǵa túsirdi. Jedel-izdestirý sharalary barysynda polıtsııa qyzmetkerleri 157 polımerli paketke salynǵan «gashısh» esirtkisin tárkiledi.

«Esirtki tasymaldaý kanalyn uıymdastyrǵan 3 er adam qamaýǵa alyndy. Olar «gashıshtiń» jalpy quny 15 mln teńgege jetetin 1,5 myńǵa jýyq dozasyn satpaq bolǵan. Qazirgi ýaqytta tergeý amaldary jalǵasýda. 1977, 1979 jáne 1980 jyly týǵan jigitter on bes jylǵa deıin bas bostandyqtarynan aıyrylýy múmkin», - deıdi ShQO Polıtsııa departamenti bastyǵynyń orynbasary, polıtsııa polkovnıgi Talǵat Shaıahmetov.