ShQO-da esirtki qoıyp ketýmen aınalysqan adam ustaldy

ASTANA. QazAqparat – Shyǵys Qazaqstan oblysynyń polıtseıleri esirtki qoıyp ketýmen aınalysqan kúdiktini ustady, dep habarlaıdy QazAqparat Polisia.kz-ke silteme jasap.

Shilde aıynyń ortasynda oblystyq PD esirtki qylmysyna qarsy is-qımyl basqarmasynyń qyzmetkerleri ShQO PD oqý-jattyǵý vzvodynyń bólimshesimen birlesip Óskemen qalasy Karbyshev kóshesi boıyndaǵy aýlalardyń birinde jedel-izdestirý is sharalaryn júrgizý barysynda 21 jastaǵy esirtki qoıyp ketýshini ustaǵan. Qaskúnem buryn Almaty qalasynda turyp, óziniń qylmystyq qyzmetin bastaǵan, sodan keıin Óskemenge esirtki taratýdy jalǵastyrý úshin kelgen, biraq úlgermegen. Ustalǵaly turǵanyn kórgen ol polıtseılerden jasyrynyp, «júkterden» qutylýǵa tyrysqan.

Óziniń qyzmetin ınternet-dúkenderdiń biriniń kómegimen júzege asyryp, úılestirýshiniń nusqaýymen Óskemen jastary arasynda odan ári taratý úshin «qara taýar» alǵany belgili boldy.

Polıtsııa qyzmetkerleri jeke tintý kezinde ustalǵan azamattyń ish kıiminen kók tústi ızolentamen oralǵan býma, onyń ishinde untaq jáne túıirshik túrindegi zat salynǵan 30 býmany jáne shalbarynyń sol qaltasynan bir temeki qorabyn, onyń ishinen jasyl ızolentamen oralǵan untaq jáne túıirshik túrindegi zat salynǵan bir býmany tárkiledi.

Sonymen qatar oqıǵa ornyndaǵy podezdiń kireberisin tekserý barysynda ishinde untaq jáne túıirshik túrindegi zaty bar 3 polımerli býma salynǵan qara tústi barsetka tabylyp, tárkilendi.
Júrgizilgen saraptama tárkilengen zattardyń jalpy salmaǵy 25 gramnan asatyn a-pvp esirtki zaty ekenin kórsetti.

Kúdikti sottyń sanktsııasymen qamaýǵa alyndy. Onyń áreketteri QR QK-niń 297-baby 3-bóligi boıynsha kvalıfıtsııalanady. Atalǵan baptyń sanktsııasy 15 jylǵa deıin bas bostandyǵynan aıyrý jazasyn kózdeıdi.