ShQO-da Ertis ózeniniń arnasyna sý jiberilip jatyr
ÓSKEMEN. QazAqparat – Shyǵys Qazaqstan oblysynda ekologııalyq tepe-teńdikti saqtaý maqsatynda Ertis ózeniniń arnasyna sý jiberilip jatyr, dep habarlaıdy QazAqparat tilshisi.
ShQO Tótenshe jaǵdaılar departamenti baspasóz qyzmetiniń málimetine súıensek, «GeoSat» JShS júrgizgen ǵaryshtyq monıtorıng derekteri boıynsha Shyǵys Qazaqstannyń qar basyp jatqan aýmaǵy 15 paıyzdan aspaıdy. Qar Altaı, Rıdder, Kúrshim aýdanyndaǵy taýly jerlerde, Marqakól qoryǵynda, Ulan aýdanynyń Taıynty ózeninde, Katonqaraǵaı, Glýbokoe, Shemonaıha aýdandarynyń taýlarynda baıqalady.
«Qazirgi ýaqytta Ertis ózeniniń arnasyna sý jiberý jumystary júrgizilýde. Mundaǵy maqsat – ekologııalyq tepe-teńdikti saqtaý. Bıyl Shúlbi GES arqyly 5,77 tekshe metr sý jiberiletin bolady», - delingen habarlamada.
Úsh kezeńde júrgiziletin sý jiberý jumystary 18 mamyrda aıaqtalady. Sý jiberýdi retteý rejımin «Ertis basseındik ınspektsııasy» júzege asyrmaq. Ondaǵy mamandar qazirdiń ózinde jumysqa kirisken.
