ShQO-da Ertis betinde munaı daǵy paıda boldy
ÓSKEMEN.QazAqparat - Ertis ózeniniń betinde munaı daǵynyń paıda bolý sebebin quzyrly organdar anyqtaýǵa kiristi, dep habarlaıdy QazAqparat tilshisi.
Oqıǵa ótken aptanyń jumasynda bolǵan. Ekologııalyq qaýipsizdik ortalyǵyna Ertistiń betinde janarmaı daǵy paıda bolǵany týraly dabyl túsedi. Sol kúni atalmysh ortalyq mamandary men ekologııa departamentiniń ókilderi oqıǵa basyna baryp, sýdyń betinen synamalar alǵan bolatyn. Júrgizgen taldaýlar sýdyń quramyndaǵy munaıdyń úlesi mólsherden 60 ese artqanyn kórsetken. Aǵystyń sál joǵary bóliginde munaıdyń sýdaǵy úlesi 14 ese kóp ekeni belgili boldy.
«Ekologııalyq qaýipsizdik ortalyǵy» JShS-niń dırektory Gennadıı Koreshkov ózenge munaı ónimi Kemejaı aýdanynan jetýi múmkin degen boljam aıtady.
«Jaqyn mańda janarmaı stansasy tur. Odan aqaý shyqsa, ózenge munaı ónimi áli de quıylyp jatar edi. Qazir ol daqtyń izi de qalmaǵan. Sál joǵaryda qum tasıtyn qaıyqtar turady. Solardan tarady ma dep otyrmyz. Áıtpese bireýdiń qasaqana sýǵa janarmaı quıýy múmkin emes», - deıdi Gennadıı Koreshkov.
Bul keleńsiz jaǵdaıdyń sebebin anyqtaýdy oblystyq ekologııa departamenti qolǵa aldy.
«Daq paıda bolǵan aýdannan úsh qaıyq tabyldy. Oqıǵaǵa qatysty jedel izdestirý sharalaryn uıymdastyryp, sýdyń lastaný kózin anyqtaý úshin Óskemen qalasynyń ishki ister basqarmasyna hat joldadyq. Ekologııa zańnamasyn buzýshylardy tapqannan soń qorshaǵan ortaǵa kelgen zııan mólsherin anyqtaımyz» - deıdi departament basshysy orynbasarynyń mindetin atqarýshy Ermak Barkyshev.
