ShQO-da ermek úshin aıaldamany talqandaǵan úsh jigit 7 jylǵa sottalýy múmkin
ShQO polıtsııa departamenti baspasóz qyzmetiniń málimetine súıensek, Altaı aýdany Serebrıansk qalasynda polıtsııaǵa belgisiz bireýlerdiń bes jol belgisi men avtobýs aıaldamasy pavılonyna zaqym keltirgeni týraly habar túsken.
Osynyń saldarynan kelgen shyǵyn 1 mln teńgeden asty.
Tártip saqshylary jedel-izdestirý sharalary barysynda úsh kúdiktini ustady.
Olar 26 jáne 18 jastaǵy aǵaıyndylar jáne olardyń 17 jastaǵy tanysy bolyp shyqty.
Belgili bolǵandaı, úsheýi aıaldamany ermek úshin talqandap ketken.
«Olar úıge qaıtyp bara jatqanda aralaryndaǵy jasy úlkeni jol belgisin tepkileı bastady. Qyzyq kórgen 17 jastaǵy jasóspirim aǵasyna qosyla ketken. Osy kezde úshinshisi de baǵanaǵa shyǵyp, jol belgisin qolymen maıystyrdy», - delingen aqparatta.
Avtobýs aıaldamasy tusynan ótip bara jatqan kezde aǵaıyndylar pavılonnyń metall qabyrǵalaryn aıaqpen teýip zaqymdaı bastasa, olardyń tanysy osy ýaqytta aıaldamaǵa qarama-qarsy ornalasqan jol belgisiniń baǵanasyn maıystyrdy. Osydan keıin vandaldar úılerine qaıtyp ketip, bolǵan oqıǵa týraly eshkimge aıtpaǵan.
«Atalǵan faktige sáıkes QR QK-niń 202-baby 1-bóligimen (bótenniń múlkin qasaqana joıý nemese búldirý) sotqa deıingi tergeý amaldary bastaldy. Bul bap boıynsha úsh myńnan jeti myń AEK-ke (10 mln 350 myń-24 mln 150 myń teńge) deıingi mólsherde aıyppul tóleýge, ne sol mólsherde túzeý jumystaryna tartylýǵa, ne úsh jyldan jeti jylǵa deıingi merzimge bas bostandyǵyn shekteýge ne sol merzimge bas bostandyǵynan aıyrýǵa jazalanýy múmkin», - delingen aqparatta.
