ShQO-da er adam órtenip jatqan úıden eki balany aman alyp qaldy

ÓSKEMEN. KAZINFORM — Shyǵys Qazaqstan oblysy Altaı aýdanynyń Solovevo aýylynda er adam órtenip jatqan úıden eki balany qutqardy.

Otqa oranǵan úıde kishkentaı balalar qalyp qoıǵan. Alaıda aýyl turǵynynyń batyldyǵy men jyldam sheshim qabyldaýynyń arqasynda olar aman qaldy.

— Solovev orta mektebiniń dene shynyqtyrý jáne alǵashqy áskerı daıyndyq pániniń muǵalimi Rýslan Seıitov jalyndy kórgen sátten bastap áreket etti. Kúshti órt pen qoıý tútinniń saldarynan úıge kire almaı, terezeni syndyryp, qorqyp qalǵan balalardy syrtqa shyǵardy, — dep habarlady ShQO ákimdiginen.

Sodan soń balalardy dereý óz úıine ákelip jylytqan.

Kórshilerniń aıtýynsha, Rýslannyń áreketteri senimdi jáne batyl boldy. Al ol bolsa óz isin batyrlyq dep sanamaıtynyn, mundaı jaǵdaıda basqasha áreket etý múmkin emestigin aıtty.

Eske salsaq, osyǵan deıin Qaraǵandy oblysynda qutqarýshylar qar qursaýynda qalǵan 12 adamdy qutqardy.