ShQO-da er adam túrmege alkogoldi ishimdikti gazdalǵan sýsyn túrinde kirgizbek bolǵan

ÓSKEMEN. QazAqparat – Shyǵys Qazaqstan oblysynda er adam túrmege alkogoldi ishimdikti gazdalǵan sýsyn túrinde kirgizbek bolǵan, dep habarlaıdy QazAqparat tilshisi.

ShQO boıynsha QAJ departamenti baspasóz qyzmetiniń málimetine súıensek, túrmedegi dosymen qysqamerzimdi kezdesýge kelgen er adam gazdalǵan sýsyn bótelkesine alkogoldi ishimdikti quıyp, ishke kirgizbek bolǵan. Alaıda bul oıyn iske asyra almady. Mekeme qyzmetkerleri jeke zattaryn tekserý kezinde joǵary gradýstyq sýsyndy tapty.

«№22 túzetý mekemesiniń qyzmetkerleri azamat ózimen birge alyp kelgen paketti muqııat teksergen. Sómkede qońyr tústi tórt plastıkalyq bótelke jáne táttiler bolǵan. Er adam tártip saqshylaryn aldamaq bolyp, ishimdikti gazdalǵan mıneraldy sý dep qabyldaıdy dep sengen. Alaıda bótelkeden alkogoldiń ıisi shyǵyp, atalǵan zattar tárkilendi», - delingen aqparatta.⠀⠀

Sondaı-aq jeke gıgıena zattarynyń arasyna jubaıynyń telefonyn salyp, túrmege aparmaq bolǵan áıel anyqtaldy.

«33 jastaǵy turǵyn omyraýdaǵy balasy jáne anasymen birge №17 túzetý mekemesinde otyrǵan kúıeýimen kezdesýge keldi. Tekserý barysynda jol sómkesiniń ishki qaltasynan jeke gıgıena quraldary bar zattardyń ishinen SIM karta salynǵan smartfon tabyldy. Áıeldiń aıtýynsha, ol zattardyń arasynda telefon bar ekenin umytyp ketken. Atalǵan faktige sáıkes tyıym salynǵan zattardy rejımdik aýmaqqa kirgizý áreketi boıynsha ákimshilik hattama toltyryldy. Eki zańbuzýshylyqqa qatysty materıaldar protsessýaldyq sheshim qabyldaý úshin sotqa jiberildi», - delingen habarlamada.