ShQO-da er adam burynǵy áıeliniń qulaǵyn kesip alǵan
ÓSKEMEN. KAZINFORM - Shyǵys Qazaqstan oblysynyń Samar aýdanynda áıelge pyshaqpen shabýyl jasaý faktisi boıynsha sotqa deıingi tergeý bastaldy.
Jábirlenýshiniń aıtýynsha, oqıǵa 25 shilde kúni Samar aýylyndaǵy dámhanalardyń birinde bolǵan. Burynǵy jubaıy jumys ornynda oǵan shabýyl jasap, birneshe ret pyshaq jaraqatyn salǵan.
- Moınyma pyshaq taqaǵanda, bar kúshimmen qolyn qaǵyp jiberýge tyrystym. Sol kezde ol meniń qulaǵymnyń bir bóligin kesip jiberdi. Qazirgi ýaqytta aýrýhanada em qabyldap jatyrmyn, - deıdi ol.
Sondaı-aq jábirlenýshi burynǵy kúıeýi buǵan deıin de ózin birneshe ret pyshaqpen qorqytqanyn aıtyp, ómiri men alty balasynyń qaýipsizdigine alańdaıtynyn jetkizdi.
Shyǵys Qazaqstan oblystyq Polıtsııa departamentiniń habarlaýynsha, atalǵan derek boıynsha sotqa deıingi tergeý júrgizilip jatyr.
- Oqıǵanyń barlyq mán-jaıyn jan-jaqty jáne obektıvti anyqtaýǵa baǵyttalǵan qajetti tergeý áreketteri júrgizilip jatyr. Kúdikti qamaýǵa alyndy. Oǵan qatysty jábirlenýshimen qandaı da bir baılanys jasaýǵa tyıym salatyn qorǵaý nusqamasy shyǵaryldy. Qylmystyq-protsestik kodekstiń 201-babyna sáıkes, tergeý múddesine baılanysty ózge málimetter jarııa etilmeıdi, – delingen habarlamada.
Polıtsııanyń málimetinshe, qylmystyq istiń tergelý barysy oblystyq polıtsııa departamenti basshylyǵynyń erekshe baqylaýynda.
Eske salsaq, osyǵan deıin Almatyda pyshaq ustaǵan top týraly habarlamadan keıin alty adam qolǵa túskeni habarlanǵan.
