ShQO-da er adam bótenniń akkaýntyn buzyp, jazylýshylarynan aqsha talap etken
ÓSKEMEN. QazAqparat – Shyǵys Qazaqstan oblysy Ulan aýdany turǵynynyń áleýmettik jelidegi akkaýntyn buzyp alǵan er adam ustaldy, dep habarlaıdy QazAqparat tilshisi.
ShQO Polıtsııa departamenti baspasóz qyzmetiniń málimetine súıensek, kúdikti 22 jastaǵy azamattyń Instagram jelisindegi akkaýntyn buzyp alyp, paıda tappaq boldy. Anyqtalǵandaı, ol jábirlenýshiniń jazylýshylarynan aqsha suraǵan.
«Atalǵan fakt boıynsha polıtsııa qyzmetkerleri Qazaqstan Respýblıkasy Qylmystyq kodeksiniń 205-baby 1-bóligi boıynsha sotqa deıingi tergeý amaldaryn bastady. Kúdikti 40 táýlikke qamaýǵa alynýy nemese 160 AEK mólsherinde aıyppul tóleýge mindettelýi múmkin», - deıdi oblystyq PD bastyǵy Saǵat Mádıev.
Esterińizge sala ketsek, osyǵan deıin ShQO-da ınternet alaıaqtardyń arbaýyna túskender 1,5 esege artqany habarlanǵan.
