ShQO-da enesiniń atynan nesıe alyp kelgen áıel 2 jylǵa túrmege qamaldy

ÓSKEMEN. KAZINFORM – Shyǵys Qazaqstan oblysynda áıel adam bildirtpeı enesiniń atynan 2 jarym mln teńge nesıe alǵan.

Oblystyq Polıtsııa departamentiniń málimetine súıensek, 28 jastaǵy áıelge alaıaqtyq jasaǵany úshin qylmystyq is qozǵaldy.

- Ol áleýmettik járdemaqy resimdeımin dep aldap, enesiniń bıometrııalyq jáne jeke derekterin banktik mobıldi qosymshada paıdalanǵan. Osylaısha, 2,5 mln teńgeden astam somaǵa birneshe nesıe alǵan, - delingen aqparatta.

Sot sheshimimen aıyptalýshynyń eki jylǵa bas bostandyǵy shekteldi. Alaıda áıel probatsııa qyzmetiniń esebinde turǵan kezde tártipti saqtamaı keldi. Naqty aıtqanda, tekserý kezinde turǵylyqty jerinde bolmaı, elektrondy baqylaý quralyn kııýden bas tartqan.

Soǵan baılanysty onyń jazasy bas bostandyǵynan aıyrýǵa qatańdatyldy.

Eske salsaq, osyǵan deıin 45 mln teńgege alaıaqtyq jasady degen kúdikti Polshadan ekstradıtsııalanǵany habarlanǵan.