ShQO-da eńbek qaýipsizdigin jasandy ıntellekt baqylaıdy
ÓSKEMEN. KAZINFORM — Shyǵys Qazaqstan oblysynda jasandy ıntellekt óndiris oryndaryndaǵy qaýip-qaterdi taldap, boljap jáne jumysshylardyń eńbek jaǵdaıyn onlaın rejımde baqylap otyrady.
Sol úshin jasandy ıntellekt negizindegi Birińǵaı tsıfrlyq monıtorıng platformasy engizilmek. Memlekettik eńbek ınspektsııasy komıteti ShQO boıynsha departamenti basshysynyń orynbasary Qaırat Ábilqaıyrovtyń aıtýynsha, jańa júıe bıyl pılottyq rejımde iske qosylady.
— Áýeli ol bes iri kásiporynda synaqtan ótedi. Al 2028 jylǵa qaraı bul tsıfrlyq platforma qaýip-qateri joǵary barlyq óndiris úshin mindetti bolady. Aımaqta qazirdiń ózinde 3786 kásiporyndy qamtıtyn «Eńbek táýekelderiniń kartasy» aqparattyq júıesi jumys istep tur. 2025 jylǵy 25 sáýirdegi derekterge sáıkes, 31 kásiporyn áleýmettik turaqsyzdyq qaýpi joǵary sanatqa jatqyzylǵan, 49 kásiporyn — ortasha táýekel deńgeıinde, 3705 kásiporyn — eń tómengi táýekel deńgeıinde, — deıdi ol.
2024 jyldyń qyrkúıeginen bastap táýekel kartasy iske qosylǵannan keıin, eńbek ınspektorlary 170 kásiporyndy joǵary táýekel aımaǵynan shyǵaryp, 3800-den astam jumysshynyń quqyǵyn qorǵady.
Osy ýaqyt aralyǵynda 42,1 mln teńge kólemindegi jalaqy qaryzy ótelip, eńbek zańnamasyn buzýdyń 72 faktisi anyqtaldy. 25 jumys berýshi ákimshilik jaýapkershilikke tartylyp, 8,1 mln teńge aıyppul tóleýge mindetteldi.
Eske salsaq, osyǵan deıin ShQO-da ekologııalyq zańnamany buzǵan qytaılyq kompanııaǵa 1 mlrd teńge aıyppul salynǵany habarlanǵan.