ShQO-da «Eńbek» baǵdarlamasymen 20 myń adam jumysqa ornalastyryldy
ÓSKEMEN. QazAqparat – Shyǵys Qazaqstan oblysynda «Eńbek» memlekettik baǵdarlamasy boıynsha 20 171 adam jumysqa ornalastyryldy, onyń 71 paıyzy turaqty jumys, dep habarlaıdy QazAqparat QR Eńbek jáne halyqty áleýmettik qorǵaý mınıstrligine silteme jasap.
«9 aıdyń qorytyndysy boıynsha Shyǵys Qazaqstan oblysynda 30 866 adam 2017-2021 jyldarǵa arnalǵan «Eńbek» memlekettik baǵdarlamasynyń qatysýshysy boldy. 20 171 adam jumysqa ornalastyrylsa, onyń 14 332-si nemese 71% turaqty jumys ornymen qamtyldy», delingen habarlamada.
Óńirde 3 746 adam eńbek naryǵynda suranysqa ıe kásipter boıynsha kásibı daǵdylardy qalyptastyrý úshin qysqa merzimdi kýrstar ótkizýdi kózdeıtin «Eńbek» memlekettik baǵdarlamasynyń birinshi baǵyty aıasynda qamtylǵan. Qysqa merzimdi kásiptik oqýdy aıaqtaǵannan keıin jumyspen qamtý ortalyqtary baǵdarlamaǵa qatysqandarǵa jumysqa ornalasýda kómek kórsetedi.
Memlekettik baǵdarlamanyń ekinshi baǵytynyń negizgi mindeti - azamattardyń kásipkerlik bastamalaryn damytý bolyp tabylady. Onyń sheńberinde bastapqy bıznesti iske asyratyn jáne iske asyrýdy josparlaıtyn, sondaı-aq buryn basqa memlekettik baǵdarlamalar sheńberinde qarjylaı qoldaý almaǵan úmitkerlerge óteýsiz jáne qaıtarymsyz negizde 100 jáne 200 AEK mólsherinde memlekettik grant beriledi.
Budan basqa, aýylda jáne qalalarda kásipkerlik áleýeti bar, isin jańadan bastaǵan kásipkerlerge, aýyl sharýashylyǵy kooperatıvterine jáne zeınetkerlik jasyna jetpegen olardyń múshelerine, sharýa jáne fermer qojalyqtaryna shaǵyn nesıe beriledi.
Shyǵys Qazaqstan oblysynda 852 adamǵa shaǵyn nesıe berildi. 100 AEK-ke deıingi memlekettik grantty memlekettik baǵdarlamanyń 219 qatysýshysy, 200 AEK-ke deıin – 579 adam aldy (jastar, az qamtylǵan jáne kópbalaly otbasylardyń músheleri, múgedektigi bar adamdar).
Memlekettik baǵdarlamanyń úshinshi baǵyty – azamattardyń jekelegen sanattaryn jumyspen qamtý úshin memleket sýbsıdııalaıtyn jumys oryndaryn qurýdy qarastyrady. Ony júzege asyrý aıasynda Shyǵys Qazaqstan oblysynda 8 112 adam jumysqa ornalastyryldy, onyń ishinde 1 056-sy áleýmettik jumys oryndaryna, 1 264-i jastar praktıkasyna jáne 5 792 adam qoǵamdyq jumysqa jiberildi.
«Sonymen qatar, eńbek resýrstarynyń utqyrlyǵyn arttyrý sheńberinde jumys kúshi kóp óńirlerden Shyǵys Qazaqstan oblysyna 1 128 adam (485 otbasy) qonys aýdardy. Qonys aýdarýshylarlardyń 607-si eńbekke jaramdy jasta, onyń ishinde 418-i jumysqa ornalastyryldy, 20-sy kásipkerlik qyzmetpen aınalysady jáne 13-i jańa turǵylyqty jerinde oqýmen qamtyldy», delingen habarlamada.
