ShQO-da «Eńbek» baǵdarlamasy aıasynda qandaı jumystar atqaryldy
ÓSKEMEN. QazAqparat – Shyǵys Qazaqstan oblysy Altaı aýdanynda «Eńbek» baǵdarlamasy aıasynda bir jyl ishinde 29 adamǵa jeke kásibin ashýǵa qaıtarymsyz grant berilgen, dep habarlaıdy QazAqparat tilshisi.
Altaı aýdandyq jumyspen qamtý ortalyǵynyń dırektory Berikjan Bekbosynov nátıjeli jumyspen qamtýdy jáne jappaı kásipkerlikti damytýdyń 2017-2021 jyldarǵa arnalǵan «Eńbek» memlekettik baǵdarlamasy aıasynda qandaı jumystar atqarylǵanyn aıtyp berdi.
«Aýdan boıynsha byltyr baǵdarlamaǵa qatysý úshin 1632 adam júgindi. Onyń ishinde 716 azamat jumys izdep júrgen. 29 adam atalǵan baǵdarlamanyń birinshi baǵytyna, ıaǵnı oblysta suranysqa ıe mamandyqtarǵa oqytyldy. Olar 3 aı boıy arnaıy kýrstan ótti. Qazir 28-i turaqty jumysqa ornalasqan», - dedi ol.
Berikjan Bekbosynovtyń aıtýynsha, «Eńbek» baǵdarlamasynyń ekinshi baǵyty – kásipkerlikti damytý. Onyń ishinde kópbalaly jáne az qamtylǵan otbasylarǵa, múmkindigi shekteýli jandarǵa, Neet sanatyndaǵy jastarǵa basymdyq berilgen.
«Bastaý bıznes» jobasy sheńberinde aýdan boıynsha 52 adam kásipkerlik negizderin oqyp shyqty. Onyń ishinde 42-si bıznes josparlaryn sátti qorǵady. Sondaı-aq 3 azamatqa 14 mln teńge mólsherinde shaǵyn nesıe berilgen. 29 adam jeke kásibin ashýǵa 583 myń teńgeden qaıtarymsyz grantqa ıe boldy. 7 grantty kópbalaly analar aldy», - dedi Altaı aýdandyq jumyspen qamtý ortalyǵynyń dırektory.
