ShQO-da elik pen jabaıy qaban atqan brakonerler ustaldy
ÓSKEMEN. QazAqparat – Shyǵys Qazaqstan oblysynda elik pen jabaıy qaban atqan brakonerler ustaldy, dep habarlaıdy QazAqparat tilshisi.
ShQO polıtsııa departamenti baspasóz qyzmetiniń málimetine súıensek, tártip saqshylary óńir aýmaǵynda brakonerlerdi ustaý boıynsha keń aýqymdy is-shara ótkizdi.
Táýlik boıy jumys isteıtin arnaıy mobıldi toptar qurylǵan. Sonyń nátıjesinde, úsh aýdanda zańsyz ań aýlaǵandar ustaldy.
«Besqaraǵaı aýdanynda 29-42 jas aralyǵyndaǵy 4 er adam quryqtaldy. Olardyń kóliginen 4 eliktiń eti, «Saıga» jáne «IJ» markaly eki myltyq, pyshaqtar, dúrbiler jáne oq-dáriler tabyldy. Al Tarbaǵataı aýdanynda tirkelmegen myltyqpen jabaıy qabandy atyp óltirgen 53 jastaǵy turǵyn ustaldy», - dedi oblystyq PD bastyǵynyń orynbasary Talǵat Shaıahmetov.
Sondaı-aq Borodýlıha aýdanynda 34 jastaǵy eki brakoner qolǵa tústi. Olardan eki eliktiń eti, qarda júretin kólik pen «IJ» markaly tegis uńǵyly myltyq tárkilendi.
Qazirgi ýaqytta kúdiktilerge qatysty QR QK 337-baby (zańsyz ań aýlaý) boıynsha sotqa deıingi tergeý amaldary júrgizilýde.
