ShQO-da elektr jelisiniń shamadan tys júktelýi saldarynan 150 ret órt shyqty
ÓSKEMEN. KAZINFORM — Shyǵys Qazaqstan oblysynda jyl basynan beri jer úılerde 427 órt boldy.
ShQO Tótenshe jaǵdaılar departamentiniń málimetine súıensek, órtterdiń úshten biri elektr jabdyqtaryn durys paıdalanbaýdan jáne tozyǵy jetken symdardan shyqqan.
Kóbinese turǵyndar úıden shyǵarda elektr quraldaryn óshirmeı qaldyryp ketedi nemese eski symdardy qoldana beredi. Sondaı-aq elektr qurylǵylaryn janǵysh zattardyń qasyna qoıyp jatady. Al bul óte qaýipti.
— Qazir elektr jelilerine túsetin júkteme birneshe ese artty. Ár úıde jańa teledıdar, kondıtsıoner, kir jýǵysh mashına men elektr plıtasy bar. Biraq jańa tehnıka satyp alarda kópshilik eski symdar ony kótere ala ma, joq pa degenge kóńil bólmeıdi, — dedi ShQO TJD Memlekettik órt baqylaý basqarmasynyń bastyǵy Nurjan Ómirjanov.
Eske salsaq, osyǵan deıin Almaty oblysynda órt saldarynan 2 adam mert bolǵany habarlanǵan.