ShQO-da el Táýelsizdiginiń otyz jyldyǵy aıasynda 140-tan astam shara ótti

ÓSKEMEN. QazAqparat –Shyǵys Qazaqstan oblysynda el Táýelsizdiginiń 30 jyldyǵy keń kólemde atalyp ótildi, dep habarlaıdy QazAqparat tilshisi.

ShQO aqparat ortalyǵynyń málimetinshe, Óskemende bıiktigi 16 metrge jýyq Táýelsizdik monýmenti ashylǵan.

Onyń bıiktigi – 15,7 m, dıametri – 10,9 m. Tóbesinde Qazaq handyǵynyń negizin qalaýshylar – Kereı men Jánibektiń músinderi, tómengi bóliginde Qazaqstannyń damý tarıhy beınelengen barelef ornatylǵan.

Monýmenttiń ortalyq bóliginde úsh joǵarǵy bıdiń – Tóle bı, Qazybek bı jáne Áıteke bı músinderi ornalasqan.

Mereke qarsańynda barlyq qalalar men aýdandarda áleýmettik nysandardyń saltanatty ashylýy, oblystyń damýyna zor úles qosqan turǵyndardy marapattaý rásimderi ótti.

Altaı aýdanynyń ortalyǵynda QR Táýelsizdiginiń 30 jyldyǵyna oraı balalar kitaphanasy ashyldy. Endi balalar bos ýaqyttaryn tıimdi ótkize alady.

Munda shyǵarmashylyq damý jáne tanymdyq demalys úshin qolaıly orta quryldy.

Ulan aýdany Gerasımovka aýylynda eki nysannyń saltanatty ashylýy ótti. Aýyl turǵyndarynyń ıgiligine jańa balabaqsha paıdalanýǵa berildi.

Sondaı-aq aýylda 400-den astam aýlany taza aýyz sýmen qamtamasyz etetin ortalyq sý qubyry ashyldy.

Joba «Aýyl – el besigi»memlekettik baǵdarlamasy boıynsha júzege asyrylǵan.

Ulan aýdanynyń Saǵyr aýylynda otbasylyq-dárigerlik ambýlatorııa ashyldy.

1981 jyly salynǵan burynǵy feldsherlik-akýsherlik pýnkt ǵımaraty 90 mln teńgege jóndeldi. Jańa jıhazdar men jabdyqtar alyndy.

Jarma aýdanynda qýaty 30 MVt jel elektr stantsııasy iske qosyldy.

Búginde bul - jańartylatyn energııa kózderin damytýǵa baǵyttalǵan «jasyl ekonomıkanyń» eń iri jobalarynyń biri.

Investıtsııanyń jalpy somasy - 7,4 mlrd teńge.

Tarbaǵataı aýdanynda Uly Otan soǵysynyń jaýyngerleri men batyrlarynyń, Aýǵan soǵysynyń ardagerleriniń qurmetine «Batyrlar alleıasy» saltanatty túrde ashyldy.

Kókpekti aýdanynyń Samar aýylynda «Aýyl-el besigi» baǵdarlamasy aıasynda salynǵan dene shynyqtyrý-saýyqtyrý kesheniniń saltanatty ashylýy ótti. Al Úlkenbóken jáne Sarybel aýyldarynda shaǵyn fýtbol alańdary ashyldy.

QR Táýelsizdiginiń 30 jyldyǵyna oraı Shyǵys Qazaqstanda barlyǵy 140-tan astam is-shara ótip, 65 jańa nysan esigin aıqara ashty.