ShQO-da eks-sheneýnikke tıesili jer telimderi memleket menshigine qaıtaryldy

ÓSKEMEN. QazAqparat – Shyǵys Qazaqstan oblysynyń Prokýratýrasy eks-sheneýnikteriniń birine tıesili jer telimderin memleket menshigine qaıtardy, dep habarlaıdy QazAqparat tilshisi.

ShQO Prokýratýrasy baspasóz qyzmetiniń málimetine súıensek, maqsatsyz paıdalanylǵan nemese bos jatqan jerlerdi memleketke qaıtarý jumystary jalǵasýda.

Sońǵy bir jylda oblys boıynsha prokýrorlyq qadaǵalaý aktileri negizinde 533 jer ýchaskesi qaıtarylǵan. Kadastrlyq quny 5,5 mlrd teńgeni quraıtyn jer ýchaskeleriniń jalpy aýmaǵy 36,9 myń gektarǵa jetedi. Máselen, Shyǵys Qazaqstan oblysynda qyzmet etken eks-sheneýnikke tıesili jer memleket menshigine qaıtarylyp otyr.

«Bul Óskemendegi 4 ýchaske jáne Buqtyrma sý qoımasynyń jaǵalaýyndaǵy 3 ýchaske 10 jyl boıy esh paıdalanylmaı kelgen. Qazir osy jerler memleket menshigine ótti. Ýchaskelerdiń naryqtaǵy quny 4,8 mlrd teńgeni quraıdy», - delingen habarlamada.

Eske salsaq, osyǵan deıin ShQO-da shoshqa fermasyn jabýǵa qatysty sot sheshimi ózgerissiz qalǵanyn habarlaǵan edik.