ShQO-da ekpini qatty taý ózenine 15 adam aǵyp kete jazdady
ÓSKEMEN.KAZINFORM — Shyǵys Qazaqstan oblysynda Jýravlıha ózenindegi sý deńgeıi kenetten kóterilip, bir top týrıske qaýip tóndirdi.
Oqıǵa Rıdder qalasyna jaqyn mańda bolǵan. Taý ózeni arqyly ótpek bolǵan 4 jol talǵamaıtyn kólikte 15 adam otyrǵan. Olardyń arasynda eresekter de, balalar da bar. Kenetten sý kóterilip, kólikter ózen ortasynda qalyp qoıǵan.
Sol kezde júk kóliginiń júrgizýshisi Aleksandr Berdıýgın men traktorshy Ivan Vasılev kezdeısoq sol mańnan ótip bara jatqan. Ekeýi lezde kómekke umtyldy.
— Biz djıpterdi bir-birine baıladyq. Al balalardy júk kóliginiń kabınasyna otyrǵyzdyq. Alaıda aǵystyń ekpini qatty boldy. Sý aǵyzyp áketken kólikterdiń biri shetimen qulady. Osy sátte oǵan baılanyp turǵan arqandy sheship, sýdan jeke alyp shyǵýǵa týra keldi. «Ýral» kóligin ózen boıymen kóldeneń qoıdym. Óıtkeni basqasha jaqyndaý múmkin emes edi, — deıdi Aleksandr Berdıýgın.
Kólikterdi sýdan shyǵarýǵa bes saǵattan astam ýaqyt ketken. Sonyń nátıjesinde er adamdar úsh kólikti jaǵaǵa shyǵaryp, 15 adamdy aman alyp qaldy. Al tórtinshi kóliktiń ıesi táýekel etkisi kelmegendikten, ol kólik áli kúnge deıin arǵy jaǵalaýda qalǵan.
Eske salsaq, osyǵan deıin Rıdderde ózenge aǵyp ketken kvadrotsıkl júrgizýshisin izdeý jumystary jalǵasyp jatqany habarlanǵan.