ShQO-da ekologııalyq zańnamany buzǵan qytaılyq kompanııaǵa 1 mlrd teńge aıyppul salyndy

ÓSKEMEN. KAZINFORM — Shyǵys Qazaqstan oblysynda jumys istep jatqan qytaılyq qurylys kompanııasy ekologııalyq zańnamany saqtamaǵan.

ShQO mamandandyrylǵan tabıǵat qorǵaý prokýratýrasynyń talaby boıynsha ekologııa departamenti qytaılyq «SINЬSIN» qurylys kompanııasy» JShS-ǵa tekserý júrgizdi. Sonyń barysynda tabıǵat qorǵaý zańnamasynyń buzylý faktileri anyqtaldy.

Naqty aıtqanda, olar asfaltbeton qondyrǵysy men usaqtaý keshenin 1 sanattaǵy obektilerge ekologııalyq ruqsatsyz paıdalanǵan. 

— Inspektordyń qaýlysymen kompanııa QR ÁQBtK-niń 328-baby 1-bóligimen ákimshilik jaýapkershilikke tartyldy. Alaıda JShS buǵan kelispeı, Óskemen qalasynyń ákimshilik quqyqbuzýshylyq isteri jónindegi mamandandyrylǵan sotyna shaǵym túsirdi. Sot sheshimimen de qytaılyq kompanııa kináli dep tanylyp, 1 mlrd teńge aıyppul tóleýge mindetteldi, — dep habarlady ShQO sotynan.

«SINЬSIN» qurylys kompanııasy» JShS oblystyq sotqa da shaǵym túsirdi. Biraq apellıatsııalyq sot sheshimdi ózgerissiz qaldyrdy.

Eske salsaq, SQO-da er adam tanysynyń otbasylyq qupııasyn taratqany úshin 4 jylǵa sottalǵany habarlanǵan.