ShQO-da ekologııalyq zańnama talaptaryn buzǵan ákimder jaýapqa tartyldy
ÓSKEMEN. KAZINFORM – Shyǵys Qazaqstan oblysy Katonqaraǵaı aýdanynda jergilikti atqarýshy organdarǵa jospardan tys ekologııalyq tekserý júrgizildi.
ShQO Ekologııa departamentiniń mamandary men mamandandyrylǵan tabıǵat qorǵaý prokýratýrasy birlese júrgizgen tekserý Katonqaraǵaı, Aqqaınar, Aqsý, Belqaraǵaı, Jambyl, Korobıha jáne Órel aýyldarynyń ákimdikterin qamtydy. Mamandar qatty turmystyq qaldyqtarmen jumys isteý kezinde ekologııalyq zańnama talaptarynyń saqtalýyn tekserdi.
Sonyń qorytyndysy boıynsha jergilikti atqarýshy organdarda qatty turmystyq qaldyqtardy jınaý, kádege jaratý, qaıta óńdeý jáne kómý jónindegi qyzmetke qajetti ekologııalyq ruqsattar men memlekettik ekologııalyq saraptamanyń qorytyndylary bolmaǵany anyqtaldy.
- Atalǵan zańbuzýshylyqtarǵa baılanysty aýyldyq okrýgterdiń ákimderi ákimshilik jaýapkershilikke tartyldy. Sonymen qatar Ekologııa departamenti zańbuzýshylyqtardy joıý jóninde nusqamalar berdi. Olardy oryndaý úshin naqty merzimder belgilendi, - dep habarlady departamenttiń baspasóz qyzmetinen.
Eske salsaq, osyǵan deıin Almatyda tekserilgen ár tórtinshi kólik ekologııalyq normaǵa sáıkes kelmeıtini habarlanǵan.
