ShQO-da kásiporynnyń sarqyndy sýy dalaǵa tógilip kelgen

ÓSKEMEN. KAZINFORM – Shyǵys Qazaqstan oblysynyń ekologtary Rıdder jáne Altaı qalalaryndaǵy «Kaztsınk» JShS-ne qatysty jospardan tys tekserý júrgizdi.

ShQO ekologııa departamentiniń málimetine súıensek, mamandar kompanııanyń óndiris oryndaryna jospardan tys 4 tekserý júrgizdi.

- Sonyń barysynda Rıdder qalasyndaǵy ken-baıytý kombınatynda jáne Tıshın kenishinde ekologııalyq ruqsat talaptarynyń buzylǵany belgili boldy. Atap aıtqanda, qaldyq qoımasynyń bógetin bekitý jáne bos qýystardy toltyrý kezinde tehnologııalyq talaptar saqtalmaǵan. Sonyń saldarynan bóget eteginen qaldyqtardyń jaıylyp, jer bederine taralýy tirkeldi. Sondaı-aq baıytý fabrıkasy men Tıshın kenishiniń aýmaǵynda sý aıdyndaryna ruqsatsyz aǵyzýlar jasalǵany anyqtaldy, - delingen aqparatta.

Al Altaı talasyndaǵy óndiris ornynda tehnologııalyq joldyń boıynda qorǵanys úıindileri jasalmaǵandyqtan, sarqyndy sýlar aınalaǵa tógilip jatqan. Sonymen qatar, shańdy basý boıynsha jumystar da júrgizilmegen.

Tekserý nátıjeleri boıynsha ekologtar kompanııaǵa zańbuzýshylyqtardy joıý týraly nusqama berip, qoldanystaǵy ekologııalyq zańnamaǵa sáıkes ákimshilik aıyppuldar saldy.

Eske salsaq, osyǵan deıin elde ekologııalyq taza metallýrgııany damytý jolǵa qoıylatyndyǵy habarlanǵan.