ShQO-da ekologııalyq talaptardy buzǵan asfalt zaýytynyń jumysy toqtatylýy múmkin

ÓSKEMEN. KAZINFORM — Shyǵys Qazaqstan oblysynda ekologtar asfalt zaýytyna qatysty jospardan tys tekserý qorytyndysyn jarııa etti. 

ShQO Ekologııa departamenti baspasóz qyzmetiniń málimetine súıensek, Novo-ıAvlenka aýyly jurtshylyǵynan turǵyn úılerdiń mańynda ornalasqan asfalt-beton zaýytyna qatysty birneshe márte aryz túsken.

Osyǵan baılanysty ekologtar «AST-Qurylys 22» JShS-ne jospardan tys tekserý júrgizdi.

— Sonyń barysynda kásiporynnyń asfalt óndirý qyzmetin tıisti ekologııalyq ruqsatsyz júzege asyrǵany anyqtaldy. Tekserý nátıjeleri boıynsha zaýyt basshylyǵy ákimshilik jaýapkershilikke tartyldy, — delingen aqparatta.

Sondaı-aq kásiporyn jumysyn ýaqytsha toqtatý týraly sheshim qabyldaý úshin is materıaldary Óskemen qalasynyń ákimshilik sotyna joldandy

Eske salsaq, osyǵan deıin ShQO-da jer qoınaýyn paıdalaný talaptaryn buzǵan kásiporyndarǵa aıyppul salynǵany habarlanǵan.