ShQO-da ekologııa zańnamasyn buzǵan kásiporynǵa 45 mln teńge aıyppul salyndy

Shyǵys Qazaqstan oblysynda ekologııa zańnamasyn buzǵan kásiporynǵa 45 mln teńgeden astam aıyppul salyndy, dep habarlaıdy Kazinform.

ShQO Ekologııa departamentine «Kaztsınk» JShS Óskemen metallýrgııa kesheniniń ekologııa zańnamasyn saqtamaıtyndyǵyna qatysty aryz kelip tústi. Soǵan oraı kásiporynǵa jospardan tys tekserý júrgizildi.

Departament qyzmetkerleri kásiporynǵa baryp, murjalarǵa ólsheý júrgizgen. Nátıjesinde, zııandy shyǵaryndylarynyń ruqsat etilgen shekten asyp ketkendigi anyqtaldy.

«Shyǵaryndylar kúkirt dıoksıdi boıynsha normadan 2,9 ese, kómirtegi oksıdi boıynsha 3,4 ese, kómirqyshqyl gazy boıynsha 1,2 ese artyq. Osylaısha, Óskemen metallýrgııa kesheni óndiristik qyzmet barysynda qorshaǵan ortaǵa zalal keltirdi. Basqa da birneshe zańbuzýshylyq tirkelgen. Ekologııalyq Kodekske sáıkes, kompanııaǵa jalpy somasy 45 319 572 teńge aıyppul salyndy», - delingen aqparatta.