ShQO-da eki ózen arnasynan tasyp jatyr
ÓSKEMEN. QazAqparat - Óskemendik mamandandyrylǵan qutqarýshylar toby Glýbokoe aýdanynyń Progress aýylynda 25 adamdy qaýipsiz jerge kóshirdi, dep habarlaıdy QazAqparat tilshisi.
Oblystyq tótenshe jaǵdaılar departamenti taratqan aqparatta atalmysh turǵyndardyń bir bóligi týystaryn, bir bóligi mektep ǵımaratyn panalaǵany aıtylǵan. Qutqarýshylar adamnan bólek 10 bas iri qara men 20 bas usaq maldy sýdan qutqarǵan.
Al osy aýdannyń Tarhanka aýylynda eki birdeı ózen arnasynan asyp, aýylǵa qaýip tóndirgen. Tótenshe jaǵdaılar mamandary sýdyń jolyn bógep, tasqyn baǵytyn aýyldan tysqary burýda.
«Sondaı-aq, «Óskemen-Semeı» jolynyń 29-shaqyrymynda sý jaıyldy. Aǵynnyń jalpaqtyǵy 50 metrge jetken. Atalmysh bólikte arnaıy beket uıymdastyrylyp, jol jóndeýshi mamandar jumys isteýde», - delingen tótenshe jaǵdaılar departamenti taratqan aqparatta.
Ǵalamtorda Óskemen qalasy men Ulan, Shemonaıha, Glýbokoe aýdandarynan bólek Katonqaraǵaı aýdanynda da bir aýylǵa sý jaıylǵany týraly aqparat tarady. Daǵdarys ortalyǵyna túsken dabyldar boıynsha jedel shtab qurylyp, qutqarýshylardyń jumysyn úılestirýde. Óskemenniń ózinde jaıylǵan sýdyń zardaptaryn joıý jumystary áli jalǵasyp jatyr.
«Sý ortasynda qalǵan turǵyndar dereý «112» jáne «138» nómirine habarlasýy kerek. Qujattary men kıim-keshegin, eń qajet degen azyq qoryn ońaı jerde ustaǵan jón. Eger úıge sý kirse, múmkindiginshe elektr jelisin ajyratý qajet. Qutqarýshylardy qaýipsiz jerde kútý kerek», - dep eskertedi tótenshe jaǵdaılar qyzmeti.
