ShQO-da eki birdeı kólikti urlap ketken jigit jol apatyna tústi
ÓSKEMEN. QazAqparat – Shyǵys Qazaqstan oblysy Ulan aýdanynda eki kólikti aıdap ketken er adam jol apatyna tústi, dep habarlaıdy QazAqparat tilshisi.
ShQO polıtsııa departamenti baspasóz qyzmetiniń málimetine súıensek, Ulan aýdandyq PB kezekshi bólimine jergilikti turǵyn habarlasqan.
Óz sózinde ol úıiniń aýlasynda turǵan «Toyota» markaly avtokóligin belgisiz bireýdiń aıdap ketkenin jetkizdi.
Sol kúni polıtsııaǵa kóligi urlanǵanyn aıtyp taǵy bir azamat júgingen.
Bul joly Ulan aýdany Bozanbaı aýylynyń turǵynyna tıesili «Chevrolet» kóligin aıdap áketken.
«Habar túsisimen tártip saqshylary izdestirý jumystaryna kirisken. Sonyń nátıjesinde eki avtokólik te tabyldy. Anyqtalǵandaı, kúdikti kóliktiń birin aýdaryp, «Óskemen-Samar» tasjolynda qaldyryp ketken. Al ekinshisi Bozanbaı aýylynyń aýmaǵynda tabyldy», - delingen aqparatta.
Qazirgi ýaqytta Óskemen qalasynyń 28 jastaǵy turǵynyna qatysty QR QK-niń 200-baby 1-bóligine sáıkes sotqa deıingi tergeý amaldary júrgizilip jatyr.
