ShQO-da eki azamat otqa oranǵan úıden zeınetkerdi alyp shyqty
ÓSKEMEN. QazAqparat –Shyǵys Qazaqstan oblysy Glýbokoe aýdanynyń 2 turǵyny órtenip jatqan úıden zeınetkerdi qutqardy, dep habarlaıdy QazAqparat tilshisi.
ShQO Tótenshe jaǵdaılar departamenti baspasóz qyzmetiniń málimetine súıensek, 6 aqpanda túngi saǵat 01:26-da Opytnoe pole kentindegi jer úıde órt shyqty. Qyzyl jalyn úıdiń qabyrǵalaryn, shatyrdyń aǵash qurylymdaryn, esikti, jıhazdy, turmystyq tehnıka men jeke zattardy sharpyǵan.
Sol mańaıdan ótip bara jatqan Alekseı Otto men Andreı Polıakov esh oılanbastan kómekke umtyldy. Tereze arqyly ishke kirgen olar 1950 jylǵy ájeıdi syrtqa alyp shyqqan», - dep habarlady vedomstvo ókilderi.
Kóp uzamaı oqıǵa ornyna kelgen órt sóndirýshiler jalpy aýdany 48 sharshy metrdi quraǵan tilsiz jaýdy tolyqtaı aýyzdyqtady. Aldyn ala málimet boıynsha órttiń shyǵý sebebi – elektr jabdyqtaryn montajdaý jáne paıdalaný kezinde órt qaýipsizdigi talaptaryn saqtamaýdan bolýy múmkin.
Zeınetkerdi qutqarǵan beıbit kúnniń batyrlary ózderi týraly aqparat berýden bas tartyp, qarapaıymdylyq tanytty.
