ShQO-da eki adamdy kólik qaǵyp ketti
ÓSKEMEN. QazAqparat – Shyǵys Qazaqstan oblysynyń Rıdder qalasynda eki jaıaý júrginshini kólik qaqty, dep habarlaıdy QazAqparat tilshisi.
ShQO Polıtsııa departamenti baspasóz qyzmetiniń málimetinshe, 28 tamyz kúni saǵat 07.00 shamasynda Shosseınaıa kóshesinde «Toyota Harier» júrgizýshisi ruqsat etilmegen tustan joldan ótip bara jatqan 40 jáne 36 jastaǵy eki adamdy qaǵyp ketti.
«Jol-kólik oqıǵasy saldarynan eki áıel jeńil dárejedegi dene jaraqatyn alyp, Rıdder qalalyq aýrýhanasyna jetkizildi. Kólik júrgizýshisine qatysty QR ÁQBtK-niń 620-baby boıynsha hattama toltyryldy. Oǵan eskertý jasalýy nemese úsh aılyq eseptik kórsetkish (1 AEK - 2778 teńge) mólsherinde aıyppul salynýy múmkin», - delingen vedomstvo málimetinde.
Sonymen qatar eki jaıaý júrginshige de jol qozǵalysy erejelerin buzǵany úshin QR ÁQBtK-niń 615-baby boıynsha hattama toltyrylǵan. Olarǵa eki AEK mólsherinde aıyppul salynbaq.
