ShQO-da eki adam qudyqtaǵy gazǵa ýlanyp qaldy
ASTANA. QazAqparat - Zyrıan aýdanynyń qutqarýshylary qudyqtaǵy gazǵa ýlanyp qalǵan eki er adamdy aman alyp qaldy, dep habarlaıdy «QazAqparat» HAA tilshisi ShQO TJD baspasóz qyzmetine silteme jasap.
Oqys oqıǵa Zyrıan aýdanynyń Grehovka aýylynda tirkelgen. Kommýnaldyq qyzmettiń eki jumysshysy qudyqta jóndeý jumystaryn júrgizgen. Sýdy aǵyzyp jiberý úshin 42 jáne 36 jastaǵy eki jumysshy motosorǵyny qosqan.
«Úsh metr tereńdikte jer asty paıdalanylǵan gazben tolyp ketetinin ekeýi eskermeı qalsa kerek. Jumysshylardyń biri qudyqqa túsip, birden esinen tanyp qalǵan. Áriptesin qutqarmaq bolyp ekinshisi de tómenge túsip, ol da qozǵala almaı qalǵan. Kásiporyn qyzmetkerlerine qutqarýshylarǵa habar berýge týra keldi», - dep habarlaıdy vedomstvodan.
Oqıǵa ornyna jetken qutqarýshylar «Drager» apparaty arqyly qudyqqa túsip, arqanmen jumysshylardyń ekeýin syrtqa alyp shyqqan. Ýaqtyly medıtsınalyq kómektiń arqasynda eki jumysshy qutqaryldy.
«Jedel járdem qyzmetin kútpesten qutqarýshylar zardap shekken adamdardy aýrýhanaǵa deıin jetkizdi. Qazirge deıin belgili bolyp otyrǵandaı, er adamdardyń biri esin jıyp, ortaq palataǵa ornalastyrylǵan», - dep habarlaıdy ShQO TJD baspasóz qyzmetinen.
