ShQO-da eki jigit kóshede esigi joq kólikpen júrgen
ÓSKEMEN. KAZINFORM – Shyǵys Qazaqstan oblysy Zaısan qalasynda eki jigit kóshede esigi joq kólikpen júrgen.
ShQO Polıtsııa departamenti baspasóz qyzmetiniń málimetine súıensek, oqıǵa Zaısan aýdanynyń ortalyǵynda bolǵan. Polıtsııa qyzmetkerleri birde-bir esigi joq kólikti aıdap kele jatqan er adamdy jaýapqa tartty. Jol júrisi qaǵıdalaryn buzý sáti kezdeısoq ótip bara jatqan adamdardyń beınerolıgine túsip, keıinnen ǵalamtor jelisinde keńinen taraǵan.
«Zaısan qalasy kósheleriniń birindegi jastar aldyńǵy jáne artqy esikteri joq kólikpen júrip, ózderi úshin de, aınalasyndaǵylar úshin de qaýipti jaǵdaı týǵyzǵan. Osylaısha, kólik quraldaryn paıdalaný erejelerin buzǵan 20 jastaǵy júrgizýshi anyqtalyp, ákimshilik jaýapkershilikke tartyldy», - delingen aqparatta.
Osy rette, polıtsııa qyzmetkerleri jol qozǵalysynyń barlyq qatysýshylaryn jol júrisi qaǵıdalaryn qatań saqtaýǵa shaqyrady.
