ShQO-da eki kommýnaldyq mekeme 7 myńnan astam adamnyń quqyǵyn buzdy
ÓSKEMEN.KAZINFORM - Shyǵys Qazaqstan oblysy Ulan aýdanynda 7 myńnan astam kommýnaldyq qyzmet tutynýshysynyń quqyǵy qorǵaldy.
Prokýratýranyń tekserisi barysynda aýdandyq ákimdikke qarasty «Molodejnyı» KMK jáne «Kommýnalnık» KMK jasasqan jylýmen jabdyqtaý, sýmen jabdyqtaý jáne sý burý qyzmetterin kórsetý týraly sharttardyń «Tabıǵı monopolııalar týraly» Qazaqstan Respýblıkasy Zańynyń talaptaryna sáıkes kelmeıtini anyqtaldy.
- Tıptik kelisimderde mindetti sharttar kórsetilmegen, monopolısterdiń halyq aldyndaǵy jaýapkershiligi tolyq kólemde aıqyndalmaǵan, al kommýnaldyq qyzmetter úshin tólemdi qaıta esepteý tetikteri formaldy sıpatta bolǵan. Atalǵan zańbuzýshylyqtar jalpy alǵanda aýdannyń 7 myńnan astam turǵyny men 231 kásipkerlik sýbektisiniń zańdy múddelerine nuqsan keltirdi, - dep habarlady ShQO prokýratýrasynan.
Prokýrorlyq qadaǵalaý aktisi boıynsha tutynýshylardyń quqyqtary tolyq kólemde qalpyna keltirilip, shart talaptary ózgertildi.
Jol berilgen quqyq buzýshylyqtar úshin «Molodejnyı» KMK jáne «Kommýnalnık» KMK-ǵa qatysty ákimshilik is qozǵalyp, memleket paıdasyna jalpy sommasy 2 mln teńgeden astam aıyppul salyndy.
Eske salsaq, osyǵan deıin shymkenttik prokýratýra 1,7 mlrd teńge negizsiz shyǵynnyń aldyn alǵany habarlanǵan.
