ShQO-da eki balany órtten qutqarǵan muǵalim marapattaldy

ÓSKEMEN. KAZINFORM — Shyǵys Qazaqstan oblysynda otqa oranǵan úıden eki balany alyp shyqqan muǵalim marapattaldy.

Eske salsaq, oqıǵa 18 qańtar kúni Shyǵys Qazaqstan oblysy Altaı aýdanyna qarasty Solovevo aýylynda bolǵan. Óz úıiniń aýlasynda júrgen Rýlan Seıitov Kopylov kóshesindegi kórshisiniń úıiniń shatyrynan tútin shyǵyp jatqanyn baıqap, birden kómekke umtylǵan.

— Úıdiń esigin ashýǵa árekettengenimen, ishi qoıý tútinge tolýyna baılanysty kirý múmkin bolmaǵan. Osydan keıin Rýlan Seıitov úıdi aınalyp ótip, synǵan terezeni kóredi. Tereze mańynda kómekke muqtaj eki balany baıqap, olardy tútinge toly úıden alyp shyǵady, — dep habarlady ShQO tótenshe jaǵdaılar departamentiniń baspasóz qyzmetinen.

Osy erligi úshin Rýlan Seıitov QR Tótenshe jaǵdaılar mınıstriniń buıryǵymen «Órtte kórsetken qaısarlyǵy úshin» medalimen marapattaldy. Medaldy oǵan Shyǵys Qazaqstan oblysy TJD bastyǵynyń mindetin atqarýshy Farhat Ámire tabystady.

Aıta keteıik, Rýlan Seıitov 14 jyldan beri Solovevo aýylyndaǵy orta mektepte dene shynyqtyrý jáne alǵashqy áskerı daıyndyq pánderiniń muǵalimi bolyp jumys isteıdi.

Osyǵan deıin muz astyna túsip ketken adamdy qutqarǵan azamat marapattalǵany jaıly habarlaǵan bolatynbyz.