ShQO-da eki adam kóz jumǵan jol apatyna sebepker bolǵan júrgizýshi 5 jylǵa túrmege qamaldy
ÓSKEMEN. KAZINFORM – Shyǵys Qazaqstan oblysynda eki adam kóz jumǵan jol apatyna sebepker bolǵan júrgizýshi 5 jylǵa bas bostandyǵynan aıyryldy.
Jol apaty byltyr jazda oblystyq mańyzy bar «Óskemen-Altaı-Úlken Naryn-Katonqaraǵaı-Rahman qaınarlary» tasjolynda bolǵan. Kia markaly avtokóligimen Óskemennen Altaı qalasyna bet alǵan er adam tasjoldyń 53-shi shaqyrymynda qarsy baǵytqa shyǵyp ketip, VAZ kóligimen soqtyǵysty.
Sonyń saldarynan VAZ júrgizýshisi men jolaýshylarynyń biri sol jerde kóz jumdy. Taǵy birneshe jolaýshy túrli deńgeıdegi dene jaraqattaryn alǵan. Kia avtokóliginiń júrgizýshisine qatysty Óskemen qalalyq №2 sotynda QR Qylmystyq Kodekstiń 345-baby 4-bóligimen sot isi qaraldy.
«Sot sheshimimen aıyptalýshy kináli dep tanylyp, 5 jylǵa bas bostandyǵynan aıyryldy. Sondaı-aq oǵan 7 jyl boıy kólik aıdaýǵa tyıym salyndy. Úkim zańdy kúshine engen joq», - dep habarlady sottyń baspasóz qyzmetinen.
