ShQO-da egin jınaýǵa tolassyz jańbyr kedergi bolyp tur

ÓSKEMEN. KAZINFORM – Shyǵys Qazaqstan oblysynda kombaındar turaqta tur. Sebebi egin jınaý jumystary tolassyz jaýǵan jańbyr saldarynan ýaqytsha toqtap qalǵan. 

Óńirde keıingi bir apta boıy aýa raıy qubylmaly bolyp, soǵan baılanysty egin jınaý qarqyny báseńsip qalǵan. 

– Jer ylǵal bolǵanda, tehnıka egistikke shyǵa almaıdy. Biraq kún ashyla salysymen, dıqandar bosqa ketken ýaqyttyń qarymtasyn óteıdi dep senemiz. Sınoptıkterdiń boljamynsha, aldaǵy aptada aýa raıy qolaıly bolady, - dedi ShQO Aýyl sharýashylyǵy basqarmasynyń basshysy Ajar Qajybekova.

Onyń aıtýynsha, bıylǵy egin jınaý naýqanyn ótken jylmen salystyrýǵa kelmeıdi.

– 2024 jyly ónim mol boldy. Al osy jylǵy jaǵdaı qıyndaý. Bir qýantarlyǵy, astyqtyń sapasy joǵary. Ásirese dándi daqyldardyń ónimdiligi jaqsy. Qazir orta eseppen gektarynan 24,6 tsentnerden jınalyp jatyr. Ótken jyly bul kórsetkish 22,3 tsentner bolǵan. Bul ár alqaptyń tıimdiligi artqanyn kórsetedi, - dedi A.Qajybekova. 

Búginde oblysta 117,8 myń gektar dándi jáne dándi-burshaqty daqyldar jınalǵan. Bul barlyq alqaptyń jartysyna jýyǵyn quraıdy. 

Aımaqtaǵy negizgi dándi daqyl – bıdaı. Bıyl ol 162,9 myń gektarǵa egildi. Qazirdiń ózinde 146,3 myń tonnasy jınaldy.

Asburshaqtyń 97,7% alqaby oryldy. Onyń ónimdiligi de artty. Naqty aıtqanda, bıyl gektarynan 27,3 tsentnerden, al byltyr 17,3 tsentner bolǵan. 

Kókónis daqyldarynan pııaz ben sábizdiń besten biri, kartoptyń ázirge 10%-y ǵana jınaldy. 

Eske salsaq, osyǵan deıin Qazaqstanda 5,9 mln tonna astyq jınalǵany habarlanǵan.