ShQO-da dúken qyzmetkerleri taýarlardy jasyryn satyp, 7 mln teńge tabys tapqan
ShQO polıtsııa departamenti baspasóz qyzmetiniń málimetine súıensek, Katonqaraǵaı aýdandyq polıtsııasynyń kezekshi bólimine JShS ókili júgindi.
Óz sózinde ol turmystyq tehnıka dúkeniniń 23 jáne 27 jastaǵy eki qyzmetkerine qatysty shara qoldanýdy suraǵan.
«Jábirlenýshiniń aıtýynsha, sýpervaızer men satýshy birlese otyryp, ótken jyldyń qańtarynan 2022 jyldyń naýryzyna deıingi aralyqta taýarlardy jasyryn satýmen aınalysqan. Máselen, klıent tańdaǵan eki taýardyń birine ǵana satylý qaǵazyn toltyryp otyrdy. Osylaısha, dúken kassasyna bir taýardyń aqshasy túspeı kelgen. Kelgen shyǵynnyń jalpy somasy 6 900 000 teńgeden asty», - delingen aqparatta.
Qazirgi ýaqytta polıtsııa qyzmetkerleri kúdiktilerdi ustady. Olarǵa qatysty kelý túrindegi bultartpaý sharasy tańdaldy.
Atalǵan fakti boıynsha QR QK-niń 189-baby 3-bóligimen sotqa deıingi tergeý amaldary júrip jatyr.