ShQO-da dopty hokkeıden el chempıonaty bastaldy
ÓSKEMEN. QazAqparat - Óskemende dopty hokkeıden Qazaqstan chempıonaty bastaldy. Sport básekesine 5 qurama sapynda 100-ge jýyq sportshy jarys jolyna shyqty, dep habarlaıdy QazAqparat tilshisi.
Jarysta aıdyn ıelerinen bólek, Astana qalasynan jáne Aqtóbe, Almaty, Soltústik Qazaqstan oblystarynan kelgen hokkeıshiler ózara sheberlik baıqasýda. Úzdik ujym aınalmaly júıe boıynsha ótetin saıys arqyly anyqtalady. Dopty hokkeıden el chempıonaty Shyǵysta osymen úshinshi márte ótkizilýde. Hokkeıshilerdiń jas ereksheligine shekteý qoıylmaǵan. Eń jas qatysýshy 19-da bolsa, egde tartqandary - 60-ty alqymdaǵan sportshylar.
«Jarys osy bir sport túrin Qazaqstan kóleminde keńinen nasıhattaý maqsatymen ótkizilip otyr. Tarıhqa kóz júgirtsek, almatylyq «Dınamo» hokkeı klýby óz ýaqytynda talaı júlde ıelendi. Biz de osy mejege jetý úshin únemi tyńǵylyqty daıyndyq júrgizip kelemiz», - dedi dopty hokkeıden ShQO bas bapkeri Evgenıı Medvedev.
Joǵary oıyn deńgeıin kórsetken sportshylar aldaǵy jeltoqsan aıynda Petropavlda ótetin QR Kýbogine joldama alady. Oblystyq dene shynyqtyrý jáne sport basqarmasynyń baspasóz qyzmetiniń habarlaýynsha, chempıonat naýryzdyń tórtine deıin jalǵasady.
