ShQO-da «Dıplommen aýylǵa» baǵdarlamasymen aqsha alǵandar mindettemesin oryndamaǵan
ASTANA. KAZINFORM — Shyǵys Qazaqstan oblysynyń Marqakól aýdanynda «Dıplommen aýylǵa» memlekettik baǵdarlamasyn iske asyrý kezinde zań buzýshylyqtar anyqtaldy. Keıbir mamandar memleketten alǵan qarjyny shart talaptaryna saı paıdalanbaǵan.
Marqakól aýdanynyń prokýratýrasy baǵdarlamany iske asyrý kezinde zańnama talaptarynyń saqtalýyna taldaý júrgizgen. Nátıjesinde memlekettik qoldaý alǵan jekelegen azamattardyń jalpy somasy 10,6 mln teńgege sharttyq mindettemelerin oryndamaǵany anyqtaldy.
Máselen, 2023 jyly Kúrshim aýdany ákiminiń qaýlysymen medıtsınalyq kolledjdi támamdap, aýdandyq aýrýhanaǵa jumysqa kelgen jas mamanǵa 5 mln teńge bıýdjettik kredıt berilgen. Buǵan qosa, oǵan 345 myń teńge kóterme járdemaqy tólengen.
Alaıda medıtsına qyzmetkeri qarjyny alǵannan keıin baǵdarlama sharty boıynsha aýyldyq eldi mekende keminde úsh jyl jumys isteý mindettemesin oryndamaǵan.
Prokýratýranyń sharalarynan keıin memleket bıýdjetine 2,95 mln teńge qaıtaryldy. Qalǵan somany óndirip alý máselesi baqylaýda.
Aıta keteıik, 2024 jylǵa deıin Marqakól aýdany Kúrshim aýdanynyń quramynda bolǵan.
Prokýratýra bıýdjet qarajatynyń zańdy ári maqsatty jumsalýyn qamtamasyz etý baǵytyndaǵy jumystar jalǵasatynyn málimdedi.
Eske salaıyq, buǵan deıin «Dıplommen aýylǵa» baǵdarlamasyna jańa mamandyqtar qosylǵanyn jazǵanbyz.
