ShQO-da depýtattar Dostyq úıiniń 25 jyldyǵyn merekeleýge qatysty
ASTANA. QazAqparat - Búgin Óskemende Májilis tóraǵasynyń orynbasary Vladımır Bojkonyń qatysýymen«Qazaqstandaǵy jáne irgeles aýmaqtardaǵy etnodemografııalyq úderister» taqyrybynda ǵylymı-praktıkalyq konferentsııa óz jumysyn bastady, dep habarlaıdy Májilistiń baspasóz qyzmeti.
28-29 qyrkúıekke josparlanǵan is-shara Óskemen qalasyndaǵy oblystyq Dostyq úıiniń 25 jyldyǵy aıasynda uıymdastyrylýda.
25 jyldyń ishinde Dostyq úıi 100-den astam etnıkalyq ókilder turatyn Shyǵys-Qazaqstan aımaǵyndaǵy birlik pen turaqtylyq, etnosaralyq kelisimniń saqtalýyna aıtarlyqtaı úles qosqan iri qoǵamdyq birlestikterdiń birine aınaldy.
Vladımır Bojko forým qatysýshylaryna arnaǵan sózinde, Shyǵys Qazaqstan oblystyq Dostyq úıi 1992 jyly Memleket basshysy N.A.Nazarbaevtyń bastamasymen qurylǵanyn aıtty.
Vıtse-spıker atap ótkendeı, 2016 jylǵy 23 qarashada Parlament depýtattary biraýyzdan Qazaqstan Respýblıkasy Táýelsizdiginiń 25 jyldyǵynyń Deklaratsııasyn qabyldady. Ol Táýelsiz Qazaqstannyń qurylýyna jáne qalyptasýyna aıtarlyqtaı úles qosqan Tuńǵysh Prezıdentimiz Nursultan Ábishuly Nazarbaevtyń strategııalyq baǵytynyń berik ustamdylyǵyn dáleldeı tústi. Konferentsııadan basqa is-sharalar jospary boıynsha Májilis depýtattary Vladımır Bojkonyń, Irına Ýnjakovanyń jáne Roman Kımniń qatysýymen Qazaqstan halqy tilderi kúnine jáne Dostyq úıleri dırektorlarynyń jıynyna arnalǵan merekelik kontsert uıymdastyrylady.
