ShQO-da densaýlyq salasynyń úzdik mamandary marapattaldy
ÓSKEMEN. QazAqparat - Medıtsına qyzmetkerleri kúni qarsańynda Óskemen qalasynda oblystyń densaýlyq saqtaý salasynyń mamandaryna arnalǵan saltanatty shara ótti, dep habarlaıdy QazAqparat.
Shara barysynda salanyń birqatar mamandaryna ShQO ákiminiń arnaıy marapattaý qaǵazy, páter kiltteri, aqshalaı jáne turǵyn úı sertıfıkattary tabystaldy.
«Medıtsına salasy - eń basty, ári mańyzdy sala. Qurmetti densaýlyq saqtaý salasynyń mamandary, sizder adamdardyń ómiri úshin kúresip, olarǵa úmit syılap júresizder. Ózge jandardyń ómirin qutqarý úshin kóp nárseni qurban etesizder. Soǵan qaramastan meıirimdi bolyp qala alasyzdar. Osy úshin sizderge alǵysymyz sheksiz. Bizdiń medıtsına salasy damı túsýi úshin qolymyzdan kelgenin jasaımyz», - dedi oblys ákimi Danıal Ahmetov.
Aımaq basshysy shyǵysta eńbekqor, óz isiniń sheberi atanǵan, jaýapkershiligi mol, bilikti dárigerlerdiń kóp ekenin atap ótti.
Bul kúni birqatar úzdik maman ataýly marapattarǵa ıe boldy. Sonymen qatar, ózderiniń kásibı merekeleriniń qarsańynda 10-ǵa jýyq dárigerge páter kiltteri tabys etildi. Al sanıtar, feldsher medbıkeler men tájirıbeden ótip júrgen dárigerlerge, aýdandyq jáne qalalyq aýrýhanalardyń bas dárigerlerine, jedel járdem qyzmetiniń júrgizýshilerine aqshalaı syıaqy men marapattaý qaǵazdary tabystaldy. Aǵymdaǵy jyly alǵash ret densaýlyq saqtaý salasynyń mamandaryna tek aqshalaı syılyqtar ǵana emes, «Senim» kásipodaǵy atynan turǵyn úı sertıfıkattary da tabys etildi.
Shara barysynda «Oblystyń densaýlyq saqtaý salasyna qosqan eren eńbegi úshin» BSMP hırýrgııa bóliminiń dárigeri Dúısen Tájibaev marapattaldy. Dıagnostıka men emdeýdiń jańa tehnologııasyn engizgeni úshin ShQO OSMTs rentgen-endovaskýlıarly zerthanasynyń basshysy Muhtar Qorabaev marapattalsa, Semeıdiń №31 brıgadasy «Úzdik jedel járdem brıgadasy» atandy. «Eń úzdik ota jasaý» nomınatsııasymen oblystyq aýrýhananyń brıgadasy marapattaldy. Al «Óz mamandyǵyna degen adaldyǵy úshin» nomınatsııasyna kezekshi medbıkeler - Gúldarııa Nurahmetova men Nurǵaını Saparǵalıeva ıe boldy. «Eń úzdik naýqastardy qalpyna keltirý ortalyǵy» bolyp ShQO-daǵy reabılıtatsııalyq ortalyq atandy. «Tańǵajaıyp is-áreket jasaǵany úshin» mıkrohırýrgııa bóliminiń basshysy Aelıta Baıbosynova marapattaldy. Ol Adına jáne Amına esimdi egizdiń kórý qabiletin saqtap qalǵan. «Aýyldyq medıtsına salasynyń úzdigi» bolyp Aıagóz aýdanynyń aýrýhanasy atandy. «Eń úzdik menedjer» nomınatsııasymen oblystyq aýrýhananyń bas dárigeri Jaıyq Jumahanov pen №17 dárigerlik ambýlatorııasynyń bas dárigeri Vladımır Lı marapattaldy. Tsıfrlandyrý boıynsha Óskemendegi №4 qalalyq aýrýhana kóshbasshy atandy.
Aıta keteıik, sońǵy jyldary ShQO-nyń densaýlyq saqtaý salasynda oń ózgerister men damý baıqalady. Medıtsına salasyna jergilikti bıliktiń erekshe kóńil bólýiniń arqasynda, atalmysh salaǵa eleýli qarjy jumsalyp, zamanaýı tehnıkalarmen jabdyqtalýda jáne áldemdik standarttarǵa saı bolý úshin túrli jaǵdaılar jasalýda. Naýqastardy emdeýdiń jańasha ádisteri engizilip, dárigerlerdi shetelge tájirıbe almasý maqsatynda joldaý arqyly ShQO medıtsınasynda eleýli ózgerister bolýda.
