ShQO-da demalys kúnderi 6 kólik órtendi
ÓSKEMEN. QazAqparat - Shyǵys Qazaqstanda ótken senbi-jeksenbi kúnderi 6 kólik órtenip, bir adam zardap shekken, dep habarlaıdy QazAqparat tilshisi.
Otqa oranǵan 6 kóliktiń beseýiniń «jasy» 30 jyldan asady.
«Áýeli, Semeı-Pavlodar tasjolynda júrip bara jatqan «LW321F» markaly júk tıegishtiń kabınasynan órt shyqqan. 37 jastaǵy júrgizýshi otty óz betimen óshirmek bolyp, tútinge ýlanǵan. Qazir ol aýdandyq aýrýhanada jatyr» - delingen oblystyq tótenshe jaǵdaılar departamenti taratqan aqparatta.
Borodýlıha aýdanynyń Zenkov aýylynda «Volga-3110» kóligi órtenip, aýdany 20 sharshy metr aýmaqqa zaqym kelgen. Órt sóndirýshiler jalyndy 40 mınýtta aýyzdyqtady.
Óskemende Abaı dańǵylynyń boıynda «Aýdı 80» markaly avtomobıldiń qozǵaltqyshynan jalyn shyǵyp, ıesi der kezinde óshirip úlgergen. Ulan aýdanynda Asýbulaq kentiniń jolynda «Lada 21015» kóligi qańtarylyp turǵan jerinen órtenip, túgeldeı janyp ketken. Órt sóndirýshiler jalynmen 10 mınýt boıy alysqan.
«Tarbaǵataı aýdanynyń Aqsýat aýylynda otqa oranǵan «ÝAZ» avtomobıli de qańtarýly bolǵan. 4 sharshy metr aýmaqty qamtyǵan otty órt sóndirýshiler 11 mınýttyń ishinde óshirdi. Al Shemonaıha qalasynda «Pejo-206» júrip kele jatqan boıda órtenip, dóńgelekteri men qozǵaltqyshy otqa orandy» - deıdi tótenshe jaǵdaı mamany Oksana Sklıar.
Onyń aıtýynsha, jyl basynan beri oblysta 81 kólik órti tirkelgen.
Foto: 1zoom.me
