ShQO-da demalys kúnderi 3 adam sýǵa ketti

ÓSKEMEN. QazAqparat – Shyǵys Qazaqstan oblysynda demalys kúnderi 3 adam sýǵa batyp ketti, dep habarlaıdy QazAqparat tilshisi.

ShQO Tótenshe jaǵdaılar departamenti baspasóz qyzmetiniń málimetine súıensek, 31 shilde kúni Semeıdegi Ozerkı aýylynda 22 jastaǵy jigit sýǵa ketti. Belgili bolǵandaı, ol dostarymen jáne týystarymen birge demalý úshin jaǵajaıǵa barǵan.

«Alysqa júzip ketken jigit óz kúshin durys baǵalamaýdyń saldarynan kóz jumdy. Qutqarýshylar onyń denesin jaǵalaýdan 40 metrdeı jerde 3 metr tereńnen tapty», - dep habarlady vedomstvo ókilderi.

Sondaı-aq sol kúni «112» qyzmetine Semeı qalasyndaǵy «Bobrovka» saıajaı qaýymdastyǵy aýmaǵynda 14 jastaǵy qyzdyń sýǵa ketkendigi jaıly habar tústi. Otbasymen birge jaǵajaıǵa kelgen ol eresekterdiń qaraýynsyz birneshe mınýtqa qalǵan kezde batyp ketti. Bul ýchaske sýǵa shomylý úshin jabdyqtalmaǵan. Qutqarýshylar qyzdyń denesin sý túbinen 5 metr tereńnen tapty.

Taǵy bir qaıǵyly oqıǵa 1 tamyzda Óskemende boldy. Saıajaı qaýymdastyǵy aýmaǵynda ornalasqan sý qoımasynda shomylyp júrgen 20 jastaǵy jigit batyp ketken.